Ngiulina - Totò:

Chisto è 'o ritratto e chiste so' 'e capille:
na ciocca 'e seta nera avvellutata.
E cheste songo' e llettere: cchiù 'e mille;
lettere 'e 'na guagliona nnammurata.

Ngiulina se chiammava sta figliola
ch'è stata 'a primma nnammurata mia.
Trent'anne so' passate... Mamma mia!

'A tengo nnanze a ll'uocchie, pare aiere:
vocca 'e curallo, 'na faccella 'e cera,
'nu paro d'uocchie verde, 'e cciglie nere.

Teneva sidece anne e io diciotto.
Faceva 'a sartulella 'o Chiatamone.
Scenneva d' 'a fatica mpunto ll'otto,
e mm'aspettava a me sotto 'o purtone.

Senza parlà, subbeto sotto 'o vraccio
nce pigliavemo e ghievemo a ffa' ammore.
Vicino 'a casa soia, ncoppa Brancaccio,
parole doce e zucchero 'int' 'o core.

Mettennoce appuiate nfaccia 'o muro,
a musso a mmusso, tutt' 'e dduie obbracciate:
dinta 'a penombra 'e n'angulillo oscuro,
quanta suspire e vvase appassiunate!

'A tengo nnanze a ll'uocchie, pare aiere:
vocca 'e curallo, na faccella 'e cera;
nu paro d'uocchie verde, 'e cciglie nere,
senza russetto... semplice e sincera.