Balcune e lloggie - Totò:

Commee a na reggia, ricca e capricciosa,
ammubbigliaie sta casa 'e tutt' 'e ccose
che saccio che piacevano a sta sposa,
balcune e lloggie carrecate 'e rose;

ncoppa 'o buffè cunfiette e sciure 'e sposa.
Ch'addore 'e sciure 'arancio pe' sta casa!
Sta casa ch'addurava 'e mille rose,
che festa dinto a ll'aria s'era spasa!

Balcune e lloggie carrecate 'e rose.
Mo so' rimasto sulo 'into a sta casa;
mme guardo attuorno e veco tutt' 'e ccose,
ma 'a sposa nun ce sta; sta fore casa.

E morta... Se n'è ghiuta mparaviso!
Pecché nun porto 'o llutto? Nun è cosa,
rispongo 'a ggente e faccio 'o pizzo a rriso,
ma dinto 'o core è tutto n'ata cosa!