SANTA LUCIA LUNTANA

di: E. A. Mario




I

Partono 'e bastimente
pe' terre assaje luntane...
Càntano a buordo: so' napulitane!
Càntano pe' tramente
'o golfo già scumpare,
e 'a luna, 'a miezo 'o mare,
'nu poco 'e Napule
lle fa vedè...

Ritornello

Santa Lucia,
luntano 'a te
quanta malincunia!
Se gira 'o munno sano,
se va a cercà furtuna...
ma, quanno sponta 'a luna,
luntano 'a Napule
nun se po' stà!

II

E sònano... Ma 'e mmane
trèmmano 'ncopp' 'e ccorde...
Quanta ricorde, ahimmè, quanta ricorde!
E 'o core nun 'o sane
nemmeno cu 'e ccanzone:
sentenno voce e suone,
se mette a chiagnere
ca vo' turnà...

Ritornello

Santa Lucia,
luntano 'a te
quanta malincunia!
Se gira 'o munno sano,
se va a cercà furtuna...
ma, quanno sponta 'a luna,
luntano 'a Napule
nun se po' stà!

III

Santa Lucia, tu tiene
sulo 'nu poco 'e mare...
ma, cchiù luntana staje, cchiù bella pare...
E' 'o canto d''e Ssirene
ca tesse ancora 'e rrezze!
Core nun vò ricchezze:
si è nato a Napule,
ce vò murì!
menù testi
Testo cliccato volte!